वारजे रामनगरमध्ये विराट हिंदू संमेलन – मुकुंदराव सहस्त्रबुद्धेंच्या मार्गदर्शनाखाली संघाच्या शताब्दीचा गजर.
साद – प्रतिसाद ऑनलाईन.
पुणे, वारजे नगर:
वारजे नगरातील रामनगर वस्ती मध्ये स्थानिक नागरिक आणि सकल हिंदू समाजाच्या वतीने कै. वनाबाई बराटे प्रा. शाळेच्या भव्य प्रांगणात विराट हिंदू संमेलन उत्साहात पार पडले. कार्यक्रमाची सुरुवात शंखनाद, दीपपूजन, भारत माता, छत्रपती शिवाजी महाराज आणि गोमाता पूजनाने झाली, ज्यामुळे संमेलनाच्या वातावरणात दिव्यता आणि उत्साह निर्माण झाला.
संमेलनाचे संयोजक ह.भ.प. भाऊ महाराज फुरसुंगीकर यांनी कार्यक्रमाची सुरुवात वारकरी शैलीत प्रास्ताविक करून हिंदू समाजासाठी संमेलनाचे महत्त्व सांगितले. धर्माचार्य महंत श्रीकांत दास धुमाळ महाराज यांनी हिंदू संस्कृती, महिला संरक्षण, धर्मसंस्कार व कुलधर्म पालन यावर प्रभावी मार्गदर्शन केले. त्यांनी महिलांना जिजाऊ व राणी लक्ष्मीबाई यांचे उदाहरण देत मुलांवर धर्माचे संस्कार करण्याचे आवाहन केले.
मातृशक्ती वक्त्या वंदना ताई नवघरे यांनी सामाजिक समरसतेवर आधारित पंचपरिवर्तन विषय मांडला, ज्यात राम आणि शबरी यांचा संवाद उदाहरण म्हणून सादर केला. प्रमुख वक्ते मुकुंदराव सहस्त्रबुद्धे यांनी संघाची 100 वर्षे यशस्वीरीत्या मांडली, ज्यामुळे संमेलनात उपस्थितांचा उत्साह दुपटीने वाढला.
कार्यक्रमात स्थानिक बालकलाकारांनी महाराष्ट्र गीत, शिव वंदना, शंभू वंदना, पोवाडा तसेच विविध सांस्कृतिक नृत्य सादर केले. सूत्रसंचालन चंद्रकांत पंडित यांनी केले तर आभार प्रदर्शन चेतन गोंडाळ यांनी केले. संमेलनाची सांगता पसायदान व महाप्रसादाने झाली.
या विराट हिंदू संमेलनात स्थानिक स्वराज्य संस्था, विविध मंदिरे, गणेश मंडळे, शिवजयंती मंडळे, युवक ग्रुप आणि परिसरातील सर्व सांस्कृतिक व समाज मंडळांचा विशेष सहभाग नोंदवला गेला. विशेष मान्यवरांमध्ये माजी उप महापौर दिलीप बराटे, युवा नगरसेवक भारतभूषण बराटे, नगरसेवक सचिन दोडके, नगरसेविका सायली वांजळे, तसेच किरण बारटक्के, सचिन बराटे, पराग ढेणे आणि वारजे नगरातील अनेक मान्यवर उपस्थित होते.
एकूण उपस्थिती ८६५, ज्यात पुरुष ३८५ आणि महिला ४८० होते. विशेष म्हणजे रामनगर येथील सर्व वस्तीतील पुरुष, महिला, तरुण-तरुणी व लहान मुलांनी दीड महिन्यापासून नियोजनबद्ध पद्धतीने कार्यक्रम यशस्वी केला. लहान मुलांनी व तरुणांनी भोजन व्यवस्थेची जबाबदारी उत्कृष्टपणे पार पाडली, ज्यामुळे संमेलन अधिक सुव्यवस्थित आणि आनंददायी झाले.
